loader
  • ለወራሹ ስለሚሰጡ የምስክር ወረቀቶችና የወራሽነት ጥያቄ (የ፲፱፻፶፪ ዓ.ም. የፍትሐ ብሔር ሕግ ፥ አንቀጽ ፭ ፥ ምዕራፍ ፪ ፥ ክፍል ፪ ፥ ንኡስ ክፍል ፫)

    @በህግ አምላክ   1 week ago
    ህግን አለማወቅ ከተጠያቂነት አያድንም!
  • loader Loading content ...
  • @በህግ አምላክ   1 week ago
    ህግን አለማወቅ ከተጠያቂነት አያድንም!

    የ፲፱፻፶፪ ዓ.ም. የፍትሐ ብሔር ሕግ። አንቀጽ ፭። ስለ ውርስ (ስለ አወራረስ)። ምዕራፍ ፪። ክፍል ፪። መብት አለኝ ባዮችን ቁርጥ በሆነ አኳኋን ስለ መወሰን። ንኡስ ክፍል ፫። ለወራሹ ስለሚሰጡ የምስክር ወረቀቶችና የወራሽነት ጥያቄ።


    ቁጥር ፱፻፺፮። ለወራሹ የሚሰጥ የምስክር ወረቀት። (፩) የምስክርነቱ ወረቀት መሰጠት።
    (፩) ወራሽ የሆነው ሰው፤ ለሟቹ ወራሽ መሆኑና ከውርሱ ላይ የሚያገኘውን ድርሻ የሚያመለክት የወራሽነት የምስክር ወረቀት እንዲሰጡት ዳኞቹን ለመጠየቅ ይችላል።
    (፪) ዳኞቹም፤ እንደዚህ ያለውን ጥያቄ ያቀረበውን ወራሽ፤ ማስረጃዎቹን ሁሉ እንዲያቀርብና አስፈላጊ መስሎ የታያቸውን ማናቸውንም የማረጋገጫ ዋስትና እንዲሰጣቸው ሊያስገድዱት ይችላሉ።

    ቁጥር ፱፻፺፯። (፪) ውጤቶቹ።
    (፩) የምስክር ወረቀቱ እስከተሰረዘ ድረስ ወራሹ በተባለው የምስክር ወረቀት እንደተገለጠው ወራሽ እንደሆነ ይገመታል።
    (፪) በወራሽነት ስም፤ በወራሹ የተፈጸሙ ተግባሮች ያሉ እንደሆነ፤ ተግባሮቹ በተፈጸሙበት ጊዜ፤ የተባለው ወራሽ የወራሽነት መብት እንዳልነበረው በግልጽ ማወቁ ካልተረጋገጠ በቀር እነዚህን ተግባሮች ለመቃወም አይቻልም።

    ቁጥር ፱፻፺፰። (፫) ስለ መሰረዝ።
    (፩) የወራሽነቱ ጥያቄ በቀረበላቸው ጊዜ ዳኞቹ፤ እነርሱ የሰጡትን የወራሽ የምስክር ወረቀት ለመሰረዝ ይችላሉ።
    (፪) እንዲህ ሲሆን፤ ወራሹ የተሰጠውን የምስክር ወረቀት መመለስ አለበት።
    (፫) ወራሹ፤ የምስክሩ ወረቀት ጠፍቶብኛል ሲል ያመካኘ ወይም በማናቸውም ሌላ ምክንያት ወረቀቱን ለመመለስ ያልቻለ እንደሆነ፤ ለወደፊቱ በዚህ በተባለው የምስክር ወረቀት እንዳይገለገልበት፤ የሚያረጋግጥ ለዚሁ የሚገባውን ዋስትና እንዲሰጥ ይፈረድበታል።

    ቁጥር ፱፻፺፱። የወራሽነት ጥያቄ (፩) መሠረቱ።
    አንድ ሰው ዋጋ ያለው የወራሽነት ማስረጃ ሳይኖረው፤ ውርሱን ወይም ከውርሱ አንዱን ክፍል በእጁ ያደረገ እንደሆነ፤ እውነተኛው ወራሽ ወራሽነቱ እንዲታወቅለትና፤ የተወሰዱበት የውርስ ንብረቶች እንዲመለሱለት፤ በዚህ ሰው ላይ የወራሽነት ጥያቄ ክስ ሊያቀርብበት ይችላል።

    ቁጥር ሺ። (፪) ጥያቄውን ለማቅረብ የተወሰነ ጊዜ።
    (፩) ከሳሹ መብቱንና የውርሱ ንብረቶች በተከሳሹ መያዛቸውን ካወቀ ሦስት ዓመት ካለፈ በኋላ፤ ስለ ወራሽነት ጥያቄ የሚቀርበው ክስ ተቀባይነት ለማግኘት አይችልም።
    (፪) እንደዚሁም ሟቹ ከሞተበት ወይም ከሳሹ በመብቱ ለመሥራት ከቻለበት ቀን አንሥቶ ዐሥራ አምስት ዓመት ካለፈ በኋላ፤ ከዘር የወረደ ርስት ካልሆነ በቀር የተባለው የውርስ ጥያቄ ክስ በማናቸውም አስተያየት ቢሆን ተቀባይነት አያገኝም።

    ቁጥር ሺ፩። (፫) ውጤቶች።
    (፩) ከሳሹ ባቀረበው የወራሽነት ጥያቄ ተከሳሹ የተረታ እንደሆነ፤ እጅ ያደረጋቸውን የወራሽነትን ንብረቶች ሁሉ ለከሳሹ መመለስ አለበት።
    (፪) በቅን ልቡና ባለሀብት ሁኛለሁ በማለት ምክንያት ሊከራከር አይችልም።
    (፫) ለቀረው ጒዳይ ሁሉ በዚህ ሕግ የተጻፉት አላገባብ መበልጸግን የሚመለከቱ ድንጋጌዎች ይፈጸማሉ።

    ቁጥር ሺ፪። (፬) ልዩ የኑዛዜ ስጦታ የተደረገላቸው ሰዎች።
    ከዚህ በላይ ባሉት ቁጥሮች የተነገሩት ድንጋጌዎች ልዩ የኑዛዜ ስጣታ ለተደረገላቸው ሰዎችም ተፈጻሚዎች ናቸው።

    ምንጭ:
    የኢትዮጵያ የ፲፱፻፶፪ ዓ.ም. የፍትሐ ብሔር ሕግ (፲፱፻፶፪)
  • loader Loading content ...

Load more...