loader
  • ልረሣሽ እየጣርኩ ነው

    @ህይወት በቀለ   3 years ago
    Sewasewer
  • loader Loading content ...
  • @ህይወት በቀለ   2 years ago
    Sewasewer

    ልረሣሽ እየጣርኩ ነው
    በጣራው ላይ ሲረማመድ፣የዝናቡ ልዝብ ኮቴ
    መጋረጃው ሲውለበለብ፣ሰንደቅ ሆኖ ለመስኮቴ
    ዋርካው፣ በቅጠል ጥዋ
    ውኃ ሲያቁር ፣ከህዋ
    የምድርን ጉሮሮ ሊያርስ
    መሬት ፣ፍጥረትን ስትጸንስ
    በዚህ ሁሉ ጸጋ መሀል ፣ያንችን መሄድ ስተምነው
    ምንም ነው፣ኢምንት ነው
    ልረሣሽ እየጣርሁ ነው፡፡
    መጣ፣ መጣ ፣መጣ፣ የዝናቡ ኮቴ አየለ
    ክረምት የፍጥረት መሲሕ፣ በቀጠሮው ከተፍ አለ፡፡
    ስስ የጉም አይነርግብ፣ውብ ገጽሽን ሸፋፈነው
    የርጥብ አፈር፣ርጥብ ሽታ ፣ውብ ሽቶሽን አዳፈነው
    ልረሣሽ እየጣርኩ ነው፡፡
    የዝናቡ ኮቴ ይደምቃል
    እንደ ብስል ሾላ ፍሬ፣አሮጌው ሰማይ ይወድቃል
    አዲስ ሰማይ ይነቃል
    አዲስ ጅረት ይፈልቃል
    እንኳንስ የእግርሽ ኮቴ፣ ጎዳናሽም ታጥቦ ያልቃል፡፡
    ልረሳሽ እየጣርኩ ነው፡፡


    በእውቀቱ ሥዩም 2005

  • loader Loading content ...

Load more...