loader
  • ስለ ዕቃዎች ማቅረብ ውል (የ፲፱፻፶፪ ዓ.ም. የፍትሐ ብሔር ሕግ ፥ አንቀጽ ፲፱ ፥ ምዕራፍ ፬)

    @በህግ አምላክ   1 week ago
    ህግን አለማወቅ ከተጠያቂነት አያድንም!
  • loader Loading content ...
  • @በህግ አምላክ   1 week ago
    ህግን አለማወቅ ከተጠያቂነት አያድንም!

    የ፲፱፻፶፪ ዓ.ም. የፍትሐ ብሔር ሕግ። አንቀጽ ፲፱። የአስተዳደር ክፍል መሥሪያ ቤቶች (አድሚኒስትራሲዮኖች) የሚያደርጓቸው ውሎች። ምዕራፍ ፬። ስለ ዕቃዎች ማቅረብ ውል።


    ቁጥር ፫ሺ፪፻፺፯። ስለ ውል አፈጻጸም።
    (፩) ዕቃ አቅራቢው ስለ ውሉ አፈጻጸም የሚያስፈልገውን ለማድረግ ምርጫና ቅድሚያ አለው።
    (፪) ዕቃ አቅራቢው ያሉበትን ግዴታዎች ለመፈጸም አስፈላጊ የሆኑትን ዕቃዎች ከሚፈቅዳቸው ሰዎች ላይ ለመግዛት ይችላል።

    ቁጥር ፫ሺ፪፻፺፰። ስለ አደጋ።
    (፩) ዕቃውን የአስተዳደር መሥሪያ ቤቱ እስኪረከበው በመካከሉ ባንድ ከዐቅም በላይ በሆነ ከፍተኛ ኀይል ምክንያት በዕቃው ላይ ለሚደርስበት አደጋ ኪሣራውን የሚችለው ራሱ አቅራቢው ብቻ ነው።
    (፪) የአስተዳደር መሥሪያ ቤቱ የቀረቡለትን ዕቃዎች ተቀብሎና በዕቃ ማከማቻ ቤቱ ካስቀመጠበት ቀን አንሥቶ ዕቃዎቹን ለመረከብ ወይም ተመላሽ ለማድረግ አንድ የመጨረሻ ውሳኔ እተሰጠበት ቀን ድረስ የዕቃ አደራ ከታቾች እንዳለባቸው ኀላፊነት ይኖርበታል።

    ቁጥር ፫ሺ፪፻፺፱። ስለ ዕቃዎች ርክክብ።
    የዕቃዎች ርክክብ በውሉ ውስጥ በተመለከተው አኳኋንና በተወሰነውም ጊዜ ውስጥ የሚፈጸም ነው።

    ቁጥር ፫ሺ፫፻። የርክክቡን ጊዜ ስለ ማስተላለፍ።
    (፩) የአስተዳደር መሥሪያ ቤት የቀረቡለትን ዕቃዎች የተበላሹ ከሆኑ የርክክቡን ጊዜ ለማስተላለፍ ይችላል።
    (፪) እንደዚህም በሆነ ጊዜ መሥሪያ ቤቱ ላቅራቢው ስለ ተበላሹት ዕቃዎች የሚያሻሽልበትን ጊዜ ልክ ወስኖ ያስታውቀዋል።

    ቁጥር ፫ሺ፫፻፩። ዋጋ ስለሌላቸው ዕቃዎች።
    የአስተዳደር መሥሪያ ቤቱ በትክክል እንደተስማማበት ዐይነት ያልሆኑትን ዕቃዎች የኒህም ጕድለታቸው ለመሥሪያ ቤቱ የሚቀርቡትን ዕቃዎች ጥቅም የሚያጠፋና አቅራቢውም በተፈለገበት ጊዜ ይህንን ጕድለት ለማሻሻል ያልቻለ ወይም ያልፈለገ እንደሆነ ሊቀበላቸው አይችልም።

    ቁጥር ፫ሺ፫፻፪። ስለ ዕቃዎች ምርመራ ኪሣራ።
    (፩) በአቅራቢው ቤት የሚደረገው የዕቃዎች ምርመራ በአቅራቢው ኪሣራ ነው የቀረው ግን በአስተዳደሩ መሥሪያ ቤት ኪሣራ ነው።
    (፪) አቅራቢውም በምርመራዎቹ ጊዜ በቦታው ላይ የመገኘት መብት አለው።
    (፫) ስለ ምርመራው አፈጻጸም የተወሰነውን ጊዜ ለአቅራቢው እንዲነግረው አስፈላጊ ነው። አሳቡንም ይሰጥ ዘንድ ይፈቀድለታል።

    ቁጥር ፫ሺ፫፻፫። ስለ አቅራቢው ኀላፊነት።
    (፩) የአስተዳደር መሥሪያ ቤቱ ያደረገው የመጠባበቅ ተግባር ያቅራቢውን ሙሉ ኀላፊነት አይቀንስለትም።
    (፪) እንዲሁም የአስተዳደር መሥሪያ ቤቱ ዕቃዎቹን በተረከበበት ጊዜ ተበላሽተው የተገኙትን ዕቃዎች ሳይቀበል ወይም በተወሰነው የመድንነት ጊዜ ውስጥ የተበላሹትን ለማሳደስ ያለውን መብት ሊያስቀርበት አይችልም።

    ቁጥር ፫ሺ፫፻፬። በሌለበት ማስፈጸም።
    (፩) በዕቃ ማቅረብ ውል አቅራቢው በፍጠነት እንዲያቀርብ የታዘዘውን ሳያቀርብ በመቅረቱ ወይም አንድ የዕቃ ማቅረብ ውል የተሰረዘ እንደሆነ በሌለበት ለማስፈጸም ማስደረግ ይቻላል።
    (፪) የአስተዳደር መሥሪያ ቤቱ ሳያቀርብ በቀረው ዕቃ አቅራቢ ተተክቶ ዕቃዎቹን ከሌለ አቅራቢ ዘንድ ገዝቶ ወይም በራሱ ፋብሪካ አሠርቶ ያቀርባል።
    (፫) የአስተዳደር መሥሪያ ቤቱም ውሉን ሳይፈጽም ከቀረው አቅራቢ ላይ ኪሣራ ለመከፈል መብት አለው።

    ቁጥር ፫ሺ፫፻፭። ለዳኞች አቤቱታ ስለ ማቅረብ።
    (፩) የአስተዳደር መሥሪያ ቤቱ የዕቃ አቅራቢነት ውል ተዋዋይ የሆነው የሚገባውን ግዴታ እንዲፈጽም ያደረገውን የማስገደጃ ወይም የውል ማፍረስ ውሳኔ ቅጣት ዳኞች ሊሽሩት አይችሉም።
    (፪) ዳኞች ማድረግ የሚችሉት ውሎቹን በመመርመር ይህ ውሳኔ (ቅጣት) አላገባብ ተደርጎ እንደሆነ አቅራቢው ኪሣራ የሚያገኝበት መብት ያለው መሆኑን ብቻ ነው።
    (፫) ከዚህም ቀጥሎ ባለው ቁጥር የተመለከተው ድንጋጌ የተጠበቀ ነው።

    ቁጥር ፫ሺ፫፻፮። ለአስተዳደሩ መሥሪያ ቤት አስቀድሞ አቤቱታ ሰለ ማቅረብ።
    (፩) ተዋዋዩ ይህን ተቀዳሚ ሥነ ሥርዐት እንዲከተል ውሉ በሚያስገድደው መጠን አስቀድሞ አቤቱታውን ለአስተዳደር መሥሪያ ቤቱ ባለሥልጣኖች ማቅረብ አለበት።
    (፪) ይህን ግዴታ የሆነውን ለመሥሪያ ቤቱ የሚቀርበውን አቤቱታ ሳያስቀድም ለዳኛ የሚያቀርበው አቤቱታ ተቀባይነት ሊያገኝ አይችልም።
    (፫) ውሉ ለአስተዳደር መሥሪያ ቤቱ ስለሚቀርበው አቤቱታ ጊዜ ወስኖ እንደሆነ ተዋዋዩም ይኸንኑ የተወሰነውን ጊዜ አሳልፎ አቅርቦ እንደሆነ ጊዜው በመተላለፉ አቤቱታው የማይቅበሉት ይሆናል። ለዳኛም የሚቀርበው አቤቱታ ተቀባይነትን ሊያገኝ አይችልም።

    ምንጭ:
    የኢትዮጵያ የ፲፱፻፶፪ ዓ.ም. የፍትሐ ብሔር ሕግ (፲፱፻፶፪)
  • loader Loading content ...

Load more...