loader
  • ዓፅም  (ገብረክርስቶስ ደስታ)

    @Birhanu Mekuria   1 year ago
    investing on my own ignorance!
  • loader Loading content ...
  • @Birhanu Mekuria   1 year ago
    investing on my own ignorance!
    ማነህ የተኛኸዉ?
    እንቅልፍ የደበተህ ሥጋህን ጥለኸው። 

    ምን ኖረኻል አንተ
    ንጉሥ ኖረኻል ወይ፣ ኖረኻል ወይ ጌታ?
    ወይ ቆሩንጮ ለባሽ ለማኙ ከርታታ?
    ሚኒስትር ደጃዝማች ወይም ፊታውራሪ 
    ባለብዙ ገንዘብ አሽከር አሳዳሪ 
    ኖረኻል ወይ አንተ?
    አጥንትህ ወላልቆ እንዲሁ የሻገተ!
    ሥራህ ምን ነበረ ቤትህ የት ነበረ?
    እርስትህ የት ቀረ?
    የተመራመረ አዋቂ ፈላስፋ 
    ብዙ መስናክል ካለም ላይ የገፋ 
    ሳትሆን አልቀረህም፣
    ጉድ ነው! መልክህ የለም።

    ማነሽ? ማነህ አንተ?
    ማናችሁ እናንተ?
    ማነሽ በዘመንሽ የዉበት እመቤት 
    ሆነሽ የገዛሽው የወንዶችን ጉልበት?
    በክንድሽ ያለቀው 
    ወጣቱ ጎልማሳ የት ነው የወደቀው?
    ምን ኖረሻል አንቺ አጥንትሽ ይናገር?
    እንጨት ተሸካሚ 
    ወይ  ኩበት ለቃሚ
    ወይ ልብስሽ ያደፈው ጥሬዋ ባላገር፣
    ወይም ሽቅርቅሯ እስቲ ተናገሪ?
    ሽቶሽ የጎረፈው መንጭቶ ከፓሪ 
    በወርቅና ባልማዝ በሉል እንደሆነ 
    ተጫውተሽ የሄድሽው ዝናሽ የገነነ።

    እስቲ ተናገሪ ቋሚ ያዳምጣል 
    አንቺ ለመሆንሽ ምስክርሽ የታል?
    ያሻሃል ምስክር 
    ሞተህ ስትቀበር
    ድንጋይ ላይ ተፅፎ የሚናገርልህ 
    ምልክት የሚሰጥ አንተ ለመሆንህ፣
    ሃውልት የሚያቆይህ 
    ዘመድ ያስፈልጋል ከሌላው ለይቶ
    መንገደኛ እንዲያውቅህ ቆሞ ተመልክቶ።

    "እገሌ ነው" ብሎ ታሪክ የሚያወራ
    እንዲደነቅልህ ቀሪው ያንተ ሥራ 
    ተነስ አንተው ጥራ!
    እጎንህ ከተትኙት ዓፅሞች በጉድጓድ 
    አለ ወይ ዘመድህ የምታውቀው ጓድ?
    ወዴት ነው አበባ የታለች እማዬ 
    ጋሼ ወዴት ይሆን የት ቀረች እትዬ?
    ጠፍቷል ምልክቱ 
    አጥንትና ሥጋህ ሲሰነባበቱ።

    ከሙታን ማኅበር በመዝገብ ገብተሃል 
    ማንኛውም አጥንት አስከሬን ሆነሃል 
    የሞት ጠባሳ ነህ አስታዋሽ ስራዉን 
    ከንቱ ነው የምትል አውይ ፍጡር መሆን!
    የተንቀራፈፈው እጅ እግሩ ሸምበቆ 
    የተከፋፈለው ሰረሰሩ ለቆ፣
    ጥርሱ ያገጠጠ አይኑ የወለቀ 
    ጎድኑ ተቆጥሮ ጅማቱ ያለቀ 
    የተገጣጠመ የተሠራ ባጥንት 
    ሥጋ ወዝ የሌለው የሰው ዘር ምልክት፣
    ሆነህ የተኛኸዉ 
    የማትታወቀው፣
    ማን ኖረሃል አንተ? 

    ምንጭ: "መንገድ ስጡኝ ሰፊ" የግጥም መድበል
  • loader Loading content ...
  • @Bilen(ብሌን)   1 year ago
    Sewasewer
    amazing!
  • @Meseret Eshetie Wubet   1 year ago
    Member of Sewasew team, and I believe in social learning!
    ጥሩ አስታዋሽ ግጥም! ስላካፈልከን እናመሰግናለን Birhanu!

Load more...