loader
  • ጄነራል ተፈሪ በንቲ ከደርግ የተሰናበቱበት እና ኮሎኔል መንግስቱ ስልጣን ያጠናከሩበት ሂደት ምን ይመስል ነበር?

    @Gosa   2 years ago
    ጎሳ ሰው ነው።
  • loader Loading content ...
  • @Gosa   2 years ago
    ጎሳ ሰው ነው።
    መጀመርያ አካባቢ ደርግ በህዝብ ዘንድ ተቀባይነትን ለማግኘት ህዝብ የሚያውቃቸውን ጄነራሎች በአመራርነት ይሾም ነበር። በዚህም መሰረት ጄነራል ተፈሪ በንቲ የደርጉ ሁለተኛ ዋና ሊቀመንበር ነበሩ (ከጄነራል አማን አንዶም በመቀጠል)። ምንም እንኯን በጊዜው  የደርጉ ሊቀመንበር ጄነራል ተፈሪ በንቲ ቢሆኑም፤ እውነተኛ የስልጣን ባለቤት የነበሩት ግን ምክትል ሊቀመንበሩ  ኮሎኔል መንግስቱ ሃይለማሪም ነበሩ። የደርጉ ሁለተኛ ሰው የነበሩት ሻምበል ፍቅረስላሴ ወግደረስ እንደሚተርኩልን ከሆነ በደርግ የመጀመርያ ጊዜያቶች አካባቢ የኢህአፓ አባሎች በደርግ ውስጥ ሰርገው ገብተው ነበረ። ኢህአፓ እነዚህን አባላት በመጠቀም፣ ከደርግ ስልጣን ለምንጠቅ ካካሄዷቸው በርካታ እንቅስቃሴዎች መካከል በደርጉ ሊቀመንበር በኮሎኔል መንግስቱ ሃይለማሪያም ላይ የተቃጣው የግድያ ሙከራ አንዱ ነው። የግድያ ሙከራው ሳይሳካ በመቅረቱ ምንክያት ኢህአፓ ሌላ  የስልጣን መጨበጫ መንገድ መፈለግ ነበረበት። ይህም መንገድ ደግሞ ደርግ ውስጥ ባሉት አባላት አማካኝነት ስልጣንን በሰላማዊ መንገድ መቀበል ነበር። 

    ከመስከረም ፲፱፻፷፱ ዓ/ ም ጀምሮ በተካሄዱ ተከታታይ ስብሰባዎች አማካኝነት  ኢህአፓ  አባሎቹን በመጠቀም የደርግን ስልጣን ሙሉ በሙሉ በሚባል መልኩ ለመቆጣጠር ችሎ ነበር...  በመሆኑም ስልጣን ለመጀመርያ ጊዜ ከኮሎኔል መንግስቱ እጅ ወጥታ በጄነራል ተፈሪ፤ በሻምበል ሞገስ እና በመቶ አለቃ አለማየሁ እጅ ዉስጥ የገባች መስላ ነበር። ኮሎኔል መንግስቱ ስልጣን ከጃቸው በመውጣቱ ምክንያት እና ስልጣን ላይ በነበሩበት ጊዜ ብዙ ጠላቶች አፍርተው ስለነበር ሁኔታዎችን በጊዜው ለሳቸው በሚመች መልኩ ካላስተካከሉ ለህልውናቸውም ጭምር አስጊ እንደሆነ አመኑ። በመሆኑም ኮሎኔል መንግስቱ ከእጃቸው የወጣችውን ስልጣን ለማስመለስ በጥር ፳፮ (26) ቀን ፲፱፻፷፱ (1969) ዓ/ም አንድ እርምጃ ወሰዱ።

    ሻምበል ፍቅረስላሴ ወግደረስ ሁኔታውን በሚከተለው መልክ ገልፀውታል። 

    "... የቇሚ ኮሚቴ አባላት ግራና ቀኝ ቦታቸውን እንደያዙ ጄነራል ተፈሪ ኮሎኔል መንግስቱን አስከትለው በስተሇላ ባለው በር በኩል ገቡ። ሁላችንም  ከመቀመጫችን ተነሳን። "እንደምን አደራቹ?" ብለው ሲቀመጡ እኛም ተቀመጥን።

    በሊቀመንበርንት ስብሰባውን የሚመሩት ጄነራል ተፈሪ "የቇሚ ኮሚቴው በዛሬው ቀን የሚወያይበትን ጉዳይ አስመልክቶ የመቶ አለቃ አለማየሁ የደርጉ ዋና ፀሃፊ ይገልፅልናል" ብለው ስብሰባው መጀመሩን ካበሰሩ በሇላ አለማሀይሁ ባጀንዳው ላይ ኣጭር ገለፃ ማድረግ ሲጀምር ስልክ ተደወለ። ስልኩ ኮሎኔል መንግስቱ ኣጠገብ ስለነበር ወዲያው ቅጭል እንዳለ መነጋገሪያውን በማንሳት ሃሎ አሉ። ከሌላው ጫፍ ማን እንደደወለ አላወቅንም። በሇላ እንደታወቀው ሌ/ ኮሎኔል ዳንዔል ነበር የደወለው። ምን እንደተነጋገሩ አልተሰማንም። ኮሎኔል መንግስቱ ብቻ "እሺ እሺ" ብለው ስልኩን ዘጉት። "ይቅርታ ስልኩ የተደወለው ከጎንደር ነው። ጎንደር ውስጥ ችግር አለ። እናንተ ቀጥሉ" ብለው ከጀርባቸው ባለው በር በኩል ውልቅ አሉ። በዚያን ጊዜ አለማየሁ እና ሞገስ ጥርጣሬ የገባቸው መሰሉ።

    አለማየሁ ንግግሩን አቇርቶ በመስኮት ውጭ ውጭውን መመልከት ጀመረ። አይኖቹ አላርፍ አሉ። ግራና ቀኝ ይመለከታል። አጠገቡ ያሉትን ሰዎች ሁሉ በጥርጣሬ ተመለከተ። ሻምበል ሞገስም በር በሩን ይመለከታል። ከአሁን አሁን አንድ ችግር ይከሰታል የሚል ፍርሃት ያደረበት ይመስላል። ሁሉም የኢህአፓ አባላት እና ደጋፊዎች ፈርተዋል። እንደፈሩት አልቀረም ኮሎኔል መንግስቱ ከወጡ ሁለት ደቂቃ እንኯን አልሞላም ከበስተጀርባ ባለው ኮሪደር የወታደሮች እርምጃ ሰማን። ወታደሮቹ ሲንቀሳቀሱ በፊት ለፊታችን ባሉት ምስኮቶች በኩል ተመለከትን። በዚህን ጊዜ ፍስሃ ደስታ "ተከበናል" አለ። ወዲያው ሁለቱም በሮች በሃይል ተበረገዱ። ሁላችንም ደነገጥን፤ ቀልባችን ተገፈፈ። ድርቅ ብለን በተቀመጥንበት ቀረን።

    በአስፈሪ ሁኔታ ጠመንጃቸውን ወድረው በርካታ ወታደሮች ወደ ውስጥ በመግባት ዙሪያችንን ከበቡን። አንድም ሰው አልተንቀሳቀሰም። ሻምበል ገብሩ ተሰማ የኦፐሬሽኑ ሃላፊ ወደ ውስጥ ገባ ብሎ "ወንድሞቼ አትደንግጡ ምንም አትሆኑም! የሚፈለጉት ጥቂት ሰዎች ብቻ ናቸው ስለዚህ ምንም ችግር ሳትፈጥሩ ጥትቃቹን እያስረከባቹ አንድ ባንድ እንድትወጡልን ብቻ ነው የምንፈልገው" አለ።

    ... ወታደሮቹ ሰገቡ ጄነራል ተፈሪ ከመቀመጫቸው ተነስተው በጀርባቸው ባለው በር በኩል ለመውጣት ፊታቸውን ወደዚያ ሲያዞሩ ወታደሮቹ ጠመንጃ ደገኑባቸው። እንደገና በፊት ለፊታቸው ባለው በር በኩል ለመውጣት ሲሞክሩ ወታደሮቹ ጠመንጃ ወድረው ካዳራሹ ኣስወጧቸው። የቀረነው ታጋቾች ሻምበል ገብሩ በሰጠን ትዛዝ መሰረት ከተቀመጥንበት ተነስተን ቆምን። ከሌ/ ኮሎኔል ተስፋዬ ገብረኪዳን በስተቀር ሁላችንም ሳናንገራግር ሽጉጣችንን እየመዘዝን አስረከብን።

    ... ማን ወዴት መሄድ እንዳለበት ለወታደሮቹ በተሰጠው መመርያ መሰረት ከፊሎቹ ወደ ግራ የቀሩት ደግሞ ወደ ቀኝ እንዲያመሩ ወታደሮቹ ተቆሟቸው። ወደ ግራ እንዲሄዱ የተደረጉት የነኣለማየሁ ቡድን ሲሆን ወደ ቀኝ ደግሞ እንዲሄዱ የተደረጉት ደግሞ የኮሎኔል መንግስቱ ደጋፊዎች የተባሉና አቇማቸውን በግልፅ ያላሳዩ ናቸው።  የነ ለማየሁ  ቡድን አባላት ጠመንጃ ተወድሮባቸው ለማረፊያ ወደተመደበላቸው ቦታ ተወሰዱ። ይህ ቦታ ከኮሎኔል መንግስቱ ቢሮ ስር የሚገኝ የመኪና ጋራዥ ነው። ይህ ቦታ ቀድሞ የንጉሱ መኪና ማቆሚያ ቦታ ስለነበር መዝጊያ አለው። የዚህ ቡድን አባላት በሙሉ በዚህ ጋራዥ ውስጥ ተቆለፈባቸው ...

    ... ከጥቂት ደቂቃዎች በሇላ ቀንደኛ የኢህአፓ ደጋፊዎችና የኮሎኔል መንግስቱ ባላጋራዎች ናቸው የተባሉት ሰባቱ የደርግ አባላት ብቻ በጋራዡ ውስጥ መገኘታቸው እንደተረጋገጠ ድምፅ የሚያፍን መሳሪያ በተጠመደባቸው ጠመንጃዎች መገደላቸው ታወቀ። በዚያን እለት የተገደሉት አባላትም የሚከተሉት ናቸው።

    ፩: ብ/ጄነራል ተፈሪ በንቲ (የደርግ ሊቀምንበር)
    ፪: የመቶ አለቃ አለማየሁ ሃይሌ (የደርጉ ዋና ፀሃፊ)
    ፫: ሻምበል ሞገስ ወልደሚካዔል (የውጭ ጉዳይና የህዝብ ማደራጃ ዘርፍ ሃላፊ)
    ፬: የአስር አለቃ ሃይሉ በላይ ( የውጭ  ጉዳይና  የህዝብ  ማደራጃ  ዘርፍ ምክትል  ሃላፊ)
    ፭: ሌ/ኮሎኔል አስራት ደስታ (የማስታወቂያ ጉዳይ ምክትል ሃላፊ)
    ፮: ሌ/ኮሎኔል ሕሩይ ኃይለስላሴ (የህዝብ ደህንነትና መረጃ ዘርፍ ሃላፊ)
    ፯: ሻምበል ተፈራ ደነቀ (የደርግ አባል) 

    ..."


                    ከተረሸኑት ሰባት የደርግ ባለሥልጣናት ውስጥ ዋነኛው የነበሩት ጄነራል ተፈሪ በንቲ።

    ይህንን በመሰለ ሁኔታ ኮሎኔል መንግስቱ ከጃቸው ያመለጠችውን ስልጣን ሙሉ በሙሉ በጃቸው አስገቡ። አገር ጥለው እስከሄዱበት እስከ ፲፱፻፹፫ ዓ/ም ድረስም በጃቸው እንደጨበጧት ቆዩ!

    ምንጭ:
    እኛና አብዮቱ
    ሻምበል ፍቅረስላሴ ወግደረስ።
  • loader Loading content ...

Load more...