Do you believe Africa is yet to be fully documented?We do! And thats why we developed Sewasew... Check it out!

loader
  • ወታደራዊ ደርግ አጼ ኃይለስላሴን ከስልጣን ሲያውርድ ያከናወናቸው መርሃ ግብሮች ምን ይመስሉ ነበር?

    @Tola (ቶላ)   1 year ago
    ከተኛ አንበሳ ዞር ዞር ያለ ቀበሮ ይሻላል!
  • loader Loading content ...
  • @Gosa   1 year ago
    ጎሳ ሰው ነው።
    አጼ ኃይለስላሴ ከስልጣን የወረዱት መስከረም ፪ (2) ቀን ፲፱፻፷፯ (1967) አመተ ምህረት ነው። ከስልጣን ከመውረዳቸው አንድ ቀን አስቀድሞ ደርግ ለኢትዮጵያ ህዝብ በቴሌቪዥን የንጉሱን ክፉ ጊዜዎች የሚያስታውስ ዶኩመንተሪ (documentary) ፊልም አቀናብሮ አስተላለፈ። ይሄ የመጀምርያው መርሃ ግብር ሲሆን አላማው ደግሞ ደርግ በሚቀጥለው ቀን ለሚያካሂደው ንጉሱን ከስልጣን የማውረድ ዝግጅት ከህዝብ ድጋፍ ለማሰባሰብ ያለመ ነበር።

    መስከረም ፪፣ ፲፱፻፷፯ ጠዋት ሁሉም የደርግ አባላት ፬ኛ ክፍለ ጦር ግቢ ውስጥ ተሰባሰቡ እና የሚከተሉትን የደርግ አባላት ንጉሱን ከስልጣን ለማውረድ እንዲሳተፉ መርጡ።
    ፩ -- ከጦር ሰራዊት: ሻለቃ ዘለቀ በየነ፣ የመቶ አለቃ መለሰ ማሩ።
    ፪ -- ከክብር ዘበኛ: ሻለቃ አበበ በላይነህ፣ የአስር አለቃ ግርማ ቡርቃ።
    ፫ -- ከአየር ወለድ: የሃምሳ አለቃ በቀለ ደጉ።
    ፬ -- ከፖሊስ ሰራዊት: ሻለቃ ደበላ ዲንሳ፣ የሃምሳ አለቃ አበራ አጋ።
    ፭ -- ከአየር ሃይል: የመቶ አለቃ ፍቅረስላሴ ወግደረስ።
    ፮ -- ከባህር ሃይል: ሊዲንግ ሲማን ታምራት ፈረደ።
    ፯ -- ከውህኒ ፖሊስ: ወታደር አምባቸው አለሙ።
    ፰ -- ከብሄራዊ ጦር: የመቶ አለቃ ሃይሌ መለስ።

    ከላይ የተጠቀሰውን ቡድን እንዲመሩ ደግሞ ሻለቃ ደበላ ዲንሳ ተመረጡ። ደርግ ይሄ ቡድን ወደ ቤተ መንግስት ከመንቀሳቀሱ በፊት ለንጉሱ ከማስታወቁም በላይ ምናልባት እሳቸው አልተባበርም ቢሉ እንዲያግባቧቸው ሲባል ደግሞ ልዑል ራስ እምሩ በቤተ መንግስት እንዲገኙ ተነግሯቸዋል። ቡድኑ ከጠዋቱ አንድ ሰዐት ተኩል ገደማ ወደ ቤተ መንግስት ተንቀሳቀሰ። ቤተ መንግስት ደረሱና ጋዜጠኞች እሥከሚመጡ ከጠበቁ በሇላ ቀጥታ ወደ ጃንሆይ ቢሮ አመሩ። ጃንሆይ ወደ ቢሮው እስከሚመጡ ድረስ ቡድኑን ያነጋገሩት ራስ እምሩ ነበሩ።


    የደርግ ቡድን ራስ እምሩን ሲያነጋግር።

    ከጥቂት ቆይታ በሇላ ጃንሆይ ከነሙሉ አለባበሳቸው ወደ ቢሮው ገቡ እና ወንበራቸው ላይ ተቀመጡ። የቡድኑ መሪ የነበረው ሻለቃ ደበላ ዲንሳ ጊዜም ሳያጠፋ ከቡድኑ መሃል ብቅ አለና የተሰጠውን ወረቀት ከኪሱ አውጥቶ ማንበብ ጀመረ። ንጉሱም የሚነበበውን በፀጥታ ማዳመጥ ቀጠሉ።


    ሻለቃ ደበላ ዲንሳ ደብዳቤውን ሲያነብ።


    ጃንሆይ የሚነበብላቸውን ሲያዳምጡ።

    ሻለቃ ደበላ ንባቡን ከጨረሰ በሇላ "ግርማዊ ሆይ! ለደህንነትዎ ሲባል ወደተዘጋጀልዎ ቦታ እንሂድ?" ብሎ ጥያቄ ቢያቀርብም ጃንሆይ በቶሎ መልስ አልሰጡትም ነበር። በመጨረሻም በራስ እምሩ አማላጅነት ጃንሆይ መልስ ሰጡ ... "እኮ የት ነው የምንሄደው?" ብለው። ራስ እምሩም እዚሁ ቀርብ አካባቢ እንደሆነ አስረድተው ንጉሱን አሳመኗቸው። ንጉሱም የመጨረሻ ቃላቸውን ተናግረው ከቢሯቸው ወጡ። የመጨረሻ ቃላቸውም እንዲህ የሚል ነበር ... "ጥሩ እንደፈለጋቹ! ብቻ የአገሪቱን ነገር አስቡበት!"


    ጃንሆይ ወደ ተዘጋጀላቸው መኪና ሲገቡ እና ቤተ-መንስግስታቸውን ላንዴ እና ለመጨረሻ ጊዘ ሲሰናበቱ።

    ምንጭ:
    "እኛና አብዮቱ"
    ፍቅረስላሴ ወግደረስ
  • loader Loading content ...

Load more...