loader
  • ስለ ሥራ ውል በጠቅላላው ፤ ስለ ሠራተኛው ሥራ (የ፲፱፻፶፪ ዓ.ም. የፍትሐ ብሔር ሕግ ፥ አንቀጽ ፲፮ ፥ ምዕራፍ ፩ ፥ ክፍል ፪)

    @በህግ አምላክ   3 months ago
    ህግን አለማወቅ ከተጠያቂነት አያድንም!
  • loader Loading content ...
  • @በህግ አምላክ   3 months ago
    ህግን አለማወቅ ከተጠያቂነት አያድንም!

    የ፲፱፻፶፪ ዓ.ም. የፍትሐ ብሔር ሕግ። አንቀጽ ፲፮። የሥራዎች አገልግሎት መስጠትን የሚመለከቱ ውሎች። ምዕራፍ ፩። ስለ ሥራ ውል በጠቅላላው። ክፍል ፪። ስለ ሠራተኛው ሥራ።


    ቁጥር ፪ሺ፭፻፳፫። ግዴታው የራሱ ስለመሆኑ።
    በውሉ ወይም በሁኔታዎቹ ተቃራኒ ነገር ከሌለ በቀር ሠራተኛው ሊሠራው ቃል የሰጠበትን ሥራ ራሱ መፈጸም አለበት።

    ቁጥር ፪ሺ፭፻፳፬። የትጉህነት አሠራር ግዴታ።
    (፩) ሠራተኛው ሥራውን በጥንቃቄ መሥራት አለበት።
    (፪) አስቦ ወይም በቸልተኛነት ወይም ባለመጠንቀቅ በአሠሪው ላይ ለሚያደርሰው ጉዳት አላፊ ነው።
    (፫) አላፊነት አለበት ወይም የለበትም ብሎ ለመገመት የሚቻለው አሠሪው ለሠራተኛው ቃል የሰጠበትን ሥራ ዐይነት እንዲሁም የሠራተኛውን የትምህርት ደረጃ ችሎታዎችና የሥራ ደረጃውን አሠሪው የሚያውቀው ወይም ይገባው የነበረውን ማወቅ መሠረት በማድረግ ነው።

    ቁጥር ፪ሺ፭፻፳፭። የሥራው ሥነ ሥርዐት (ዲሲፕሊን)።
    የሥራውን አፈጻጸም የሚመለከቱ የአሠሪው ትእዛዞች፤ ለውሉ ለሕጉና ለመልካም ጠባይ አንዳችም ተቃራኒነት ከሌላቸውና እነዚህንም መፈጸም አደጋ የማያመጣ ከሆነ ሠራተኛው መታዘዝ አለበት።

    ቁጥር ፪ሺ፭፻፳፮። መሠራት የሚገባው ሥራ። (፩) መሠረቱ።
    ሠራተኛው ሊሠራው ግዴታ የገባበትን ሥራ ብቻ መሥራት አለበት።

    ቁጥር ፪ሺ፭፻፳፯። (፪) ስለ ሥራ መለወጥ።
    (፩) ቢሆንም ተቃራኒ የውል ቃል ከሌለ በቀር አሠሪው ስለ ሥራው ማካሄጃ ጥቅም አስፈላጊ ሆኖ የሠራተኛውን ደመወዝ የሚቀንስ ወይም ከሁኔታው ዋና ነገር የሚለዋወጥ ካልሆነ በቀር ሌላ ልዩ ሥራ መስጠት ይችላል።
    (፪) አዲሱ ሥራ ሠራተኛው ከተቀጠረበት ሥራ ይበልጥ ከፍ ያለ ደመወዝ ያለው እንደሆነ፤ ሠራተኛው ይህን ደመወዝ ለማግኘት መብት አለው።

    ቁጥር ፪ሺ፭፻፳፰። (፫) ስለ ተጨማሪ ሥራ።
    (፩) አሠሪው በውሉ ከተመለከተው በላይ የሥራ ፍሬ እንዲሰጥ ሠራተኛውን መጠየቅ ይችላል።
    (፪) ሠራተኛው ይህን ተጨማሪ ሥራ መሥራት ከቻለና አልሠራም ማለቱም ለቅን ልቡና አሠራር ተቃራኒ የሆነ እንደሆነ፤ ሠራተኛው ይህን ተጨማሪ ሥራ መሥራት አለበት።
    (፫) ሠራተኛውም አስቀድሞ በተስማሙበት ደመወዝ አንጻር በተወሰነውና በሁኔታዎቹ ዐይነት ለዚህ ተጨማሪ ሥራ ተጨማሪ የሥራ ዋጋ ለማግኘት መብት አለው።

    ቁጥር ፪ሺ፭፻፳፱። (፬) በቁጥር ወይም በሙሉ ሥራን ስለ መሥራት።
    (፩) በቁጥር ወይም በሙሉ ሥራው ደመወዝ የሚከፈለው ሠራተኛ አሠሪው ከሆነው ሰው ውሉ በሚጸናበት ጊዜ ሁሉ በቂ የሆነ ብዛት ያለው ሥራ እንዲሰጠው ለመጠየቅ መብት አለው።
    (፪) በቁጥር ወይም በሙሉ የሚሠራ ሥራ፤ ለመስጠት ካልቻለ አሠሪው በሰዓት ወይም በቀን ሠራተኛውን ሊያሠራው ይችላል።

    ቁጥር ፪ሺ፭፻፴። መሣሪያዎችን መሥሪያዎችን (፩) ስለማቅረብ።
    (፩) ተቃራኒ የውል ቃል ወይም ልማድ ከሌለ በቀር ለሥራው አስፈላጊ የሚሆኑትን መሥሪያዎችና መሣሪያዎች ለሠራተኛው የሚያቀርበው አሠሪው ነው።
    (፪) ሠራተኛው ግዴታ ሳይኖርበት በሙሉ ወይም በከፊል ያቀረባቸው እንደሆነ፤ አሠሪው ኪሣራውን ይከፍለዋል።

    ቁጥር ፪ሺ፭፻፴፩። (፪) በጥበቃ ስለ ማኖር።
    ሠራተኛው ለሥራው አፈጻጸም የተሰጡትን ነገሮች በጥንቃቄ መያዝ አለበት።

    ቁጥር ፪ሺ፭፻፴፪። ሠራተኛው ስለሚፈጥረው ነገር።
    (፩) ለአሠሪው ሥራ ሲል ሥራውን በሚሠራበት ጊዜ ቢሆንም እንኳ ሠራተኛው ፈጥሮ ያወጣው ነገር የራሱ ነው።
    (፪) ነገር ግን ሠራተኛው ፈጥሮ ወይም ፈልጎ እንዲያወጣ በተለይ ተቀጥሮ እንደሆነ ለአሠሪው ይሆናል።

    ቁጥር ፪ሺ፭፻፴፫። የሥራ ማካሄጃን ስለሚመለከቱ መግለጫዎች።
    (፩) ሠራተኛው የሥራው ውል ካለቀ በኋላም ቢሆን በሥራው ጊዜ ያወቃቸውን የአሠሪውን ምስጢሮች መጠበቅ አለበት።
    (፪) በአሠሪው ላይ ጉዳት በማድረግ ዐይነት በሥራው ጊዜ ያገኛቸውን መግለጫዎች ሊሠራባቸው አይገባውም፡

    ምንጭ:
    የኢትዮጵያ የ፲፱፻፶፪ ዓ.ም. የፍትሐ ብሔር ሕግ (፲፱፻፶፪)
  • loader Loading content ...

Load more...